एक सामाजिक तथा युवा अभियन्ता जो समाज रुपान्तरणमा अनवरत लागिरहेका छन्​

राजन कोइरालाको कथा त्यति लामो छैन तर प्रभाव भने राष्ट्रिय तथा अन्तराष्ट्रिय स्तरमा देखिँदै गएको छ । वि सं २०४२ मा धादिङ, केवलपुरमा जन्मिएका कोइरालालाई गाउँ, शहर र प्रवास तिनैतिरको सामाजिक र पारिवारिक मूल्यमान्यताको भोगाई र अनुभव छ ।
२०४६ देखि साविकको सितापाइला गाविसका स्थाई बासिन्दा कोइराला पढाइको सिलसिलामा २०६१ देखि २०७० सम्म अमेरिकामा बसेर समाज रुपान्तरणको उद्देश्य बोकेर नेपाल फर्केका हुन् । आमसंचार र पत्रकारितामा स्नाकोत्तर हासिल गरेका कोइरालाको प्रेस र पत्रिकारिता, शिक्षा तथा रोजगारीका साथै व्यवस्थापनमा डेढ-दशकको अनुभव छ ।
हालसम्म युवा शशक्तिकरण, गुणस्तरीय शिक्षा, व्यक्तित्व विकास एवं आत्मविकासमा ४ लाख बढी सहभागीलाई प्रशिक्षण, परामर्श, अन्तरक्रिया कार्यक्रम तथा विभिन्न सत्र संचालन गरेर सेवा प्रदान गरिरहेका कोइराला हाल दूरदृष्टि एवं सुशासनका मुदा बोकेर राजनीतिमा समेत सक्रिय छन् । एक दर्जन बढी कर्पोरेट तथा सामाजिक सम्मान र पुरस्कार पाएका कोइराला राष्ट्रिय स्वतन्त्र पार्टी, नागार्जुन नगर कमिटिका सभापति हुन् ।